Cosa dirà la gente?

Lino Carpinteri e Mariano Faraguna, giornalisti e scrittori, entrambi nati a Trieste nel 1924, per anni hanno dilettato con il loro umorismo i triestini sia col settimanale “La Cittadella” che in Rai con la più che trentennale rubrica “El Campanon”. I brani sotto riportati sono tratti dal libro “Cosa dirà la gente?” (Mgs Press, 1999). I temi sono quelli di attualità ambientale, il pericolo atomico, l’effetto serra e la Ferriera di Servola.

Energia nucleare pulita

– Ma questo no xe sincrotrone? O sì?
– Ma dài, mama, cossa te vardi Piero Angela, varda pitosto Derick, che ‘sto ultimo iera belissimo… un vecio, ma belissimo…
– E Marconi, mona, cossa te credi ti che iera Marconi? Un diletante… Che ga intuido e ga avù cul…
– Uh, figùrite… apena che i la farà, salterà su i Verdi e i dirà: “Nooo, xe inquinante, no se devi, no se pol, guai far!”.
– No, idrogeno xe Acca… Acca Due O, difati, xe l’acqua.
– Tuto progredissi, caro mio. Una volta, presempio, in tuti i cessi iera carta de giornal. Adesso xe dieci piani di morbidezza…
– Ma no l’atomo fugente… l’attimo… Sta zita co’ no te sa…


Chernobyl, pioggia nucleare

– Ma fall-out xe più che black-out?
– Figùrite, se nasseva in America, el casoto: i verdi, le marce dela pace… Dio che meschinità!
– Mi no digo, pol suceder. Però contar, contar subito, orca!
– Ma cossa Zichipachi? Zichichi, quel atomico sicilian! Zichipachi xe Zikipaki, Zikipù…
– Fermi ga inventà le centrali atomiche. Che Mussolini lo ga mandà via del’Italia. Che stupido, che con lu el podeva vinzer la guera…


L’effetto serra

– Ma no sera, sempia: serra!... Semo noi triestini che disemo sera, anzi sàra… bona sàra! efeto sera sarà che anche Trieste finirà soto acqua…
– Xe tuto per via del’Atlantide, no, scusa, del Antartide che se squaia… Per cossa xe andà a fondo el Titanic? Per l’iceberg che se gaveva molà, zà quela volta, pènsite! E alora perché adesso i fa tanto casìn?...
– Pezo de tuto per el gas de scarico xe i motorini, perché lori brusa oio… e in più i sorpassa a destra… e sul marciapìe! E a mi, perché per zinque minuti davanti dela farmacia…
– Ben: co’ Trieste andarà soto acqua no sarà più i problemi de Trieste, almeno no quei…
– Sì, mama, domani! Xe roba de secoli, sa, ’sta roba!... E po’ ti, mama, te sta in quarto pian…
– Natural che Trieste andarà soto… Piazza Granda cossa sarà? Un metro sul livelo del mar… E el sindaco gaverà el cul in acqua. Chi sa chi che sarà sindaco quela volta…


Sincrotone a Basovizza

– Ma sincrotone xe più o meno de protosincrotone?
– Ma no Aria di ricerca! Area di ricerca! Area come l’area del triangolo retangolo, sempia!
–Ma no Salèm! Salàm iera quel del Centro de Fisica! Abdul Salàm. Salèm iera podesta soto el fassio, ma una bravissima persona. Enrico Paolo Salèm! El ga messo i semafori.
– Ma no, mama, cossa ghe entra Dio, mama. Uno pol benissimo creder che tuto vien del atomo senza tocar Dio. Perché chi ga creà l’atomo? Dio. Comunque parleremo, se te vol, mama de ’ste robe, ma no per telefono…
– cossa che xe el sincrotrone? Xe semplicissimo: xe un acceleratore di particellule.

Timori per la Ferriera

– Me ricordo co’ iero picio, col scuro el ciel iera rosso, e nono diseva: “No, no, xe la Feriera…”
– Iera una volta una canzon che diseva “suona campana suona”, vien giù la sera, ma non ritorna l’uomo dalla Ferriera…”. Ah, no: quela iera la miniera… O no? Ben indiferente feriera o miniera, xe che qua i ne frega ogni giorno qualcossa…
– El pan de Servola! Coss’ che no iera una volta el pan de Servola!
– Cossa che i fa in Feriera? El fero, i fa, ah, mona!
– El mal xe – me spiegava un che sa – che se i la distuda, dopo ghe vol mesi per tornar a impizarla.
– El Due andava a Servola, che adesso inveze el Due xe el tram de Opcina, fin che no i ne lo cava…
– Mi me fa impression co’ i mostra in tivù el fero che i squaia. Te se imagini meter un dito dentro?