Presso le Grafiche Fiorini a Verona nel 1985, Fausto Tuzzi pubblicò il libro “Un poco de tuto…”, una raccolta di versi in triestino. Di seguito tre poesie tratte dal suo libro.Le mule triestine
Xè stà calcolà e giudicà,
che le mule triestine
sia le più bele del mondo.
– Coss’ te fa quei oci? Perchè?
Perchè le xè fie de zento incroci.
Cò iera l’Austria, tanti ani fa.
Una balerina vienese: un bonbon.
– Te vol saver chi che la gà sposà?
– Un pescador istrian.
E ’l suocero iera furlan…
Una serva furlana la voleva un triestin
e la gà ciolto un murador carsolin.
Mama mia che fioi!
Tiradi su cola iota
e piadine de radicio e fasoi.
La beleza xè un segreto
del’ incrociar le razze.
Varda i’ inglesi:
tuti cugini tuti precisi.
E i tedeschi? Fati in serie.
Gavemo altri incroci con greghi e ebrei
ma i fioi nasseva sempre bei.
Alora stè bele mule triestine,
bionde o more coi oci ciari
o coi oci neri ma sinceri,
cossa le ciameremo signorine?
No! Mule triestine, nate al’ ombra del melon.
Pecà che i lo gà taia a fetine
e no ’l xè più tanto bon…
Autuno
Pioveva. I muli fora de scola
i plozcava co le papuzze nele galuse
e nel ploc dela strada…
I alberi senza foie
pianzeva sui rami nudi.
La scola iera apena scominziada.
Le maestrine coreva
per ciapar la coriera.
El ciel iera scuro
sepolto come un morto
in una granda coverta nera.
Dopo la piova
Guarda, dopo la piova,
el ciaro dela Luna
nele galuse dela strada…
Guarda le iozze dele gorne
che senza pie
le cori verso ’l marciapie…
e, veder in una iozza
due oci celesti
che me fissava…
La piova xè finida,
le galuse xè sugade,
resta solo le tue ociade
e quattro nuvoli nel ciel…
Nessun commento:
Posta un commento